pipi pi moli luka, CatDancing |
pipi pi moli luka li jo e noka tu tu. tan ni la ona li anpa ala li ken tawa pi wawa mute. ona li jo e luka tu sama jan. taso luka ona li linja li jo ala e palisa luka li jo e kulupu linja utala. tan ni la ni li lon: pipi ni li luka e pipi ante la pipi ante ni li ken ala weka. pipi pi luka moli li jo e lipu pipi tu kin. jan mute li sona ala e ni: pipi ni li ken tawa kon pi pona mute.
pipi pi moli luka li lukin sama ni: ona li toki tawa jan sewi. tan ni la jan mute li nimi e ona kepeken nimi "pipi pi nasin sewi". taso ona li toki ala tawa jan sewi. ona li lukin sama ni tan ni: luka ona li poka sinpin ona la ona li ken tawa pi wawa mute e luka ona.
pipi ni li nasa kin. jan mute li toki e ni: pipi ni li wile e ni: pipi ni meli taso li lon tan ni: tenpo mute la pipi ni meli li moku e mije ona. taso jan mute ala li sona e ni: moku li lon la pipi meli li moku ala e mije ona. tenpo unpa li pini ala la pipi meli li moku ala e mije ona. mije li pona unpa la meli li moku ala e mije ni. tan ni la ni kin li lon: pipi ni li wile e ni: mije ike li lon ala. mi mute li ken toki e ni: mije li pona la meli li pilin e ni: "mi wile moku. tenpo unpa li pini. taso mije ni li pona mute. mi wile ala moku e mije pona tan ni: tenpo unpa sin li open la ni li ken lon: mije ni li kama tawa mi kin!".
jan Mika